اون سكزنجى لمعه

برنجى كرامتِ علويه

جاىِ دقّت

شو عجيب لمعه نڭ أهمّيتى اوچ نقطه دن گلييور:

برنجيسى و أڭ مهمّى: گيزلى قالمش، غيبى، مهمّ بر معجزۀِ أحمديه يى (عصم) (حاشيه) بيان ايدر كه؛ جوامع الكلم نوعندن ايكى جمله دن عبارت بر حديثِ شريف ايكى صحيفه قدر حقائقِ تاريخيه يى و ايكى دولتِ عظيمۀِ إسلاميه نڭ خاتمه لرينى إفاده ايدييور.
ايكنجيسى: كراماتِ أولياء حق اولديغنه قطعى بر برهان گوسترن حضرتِ على رضى اﷲ عنهڭ لاتين حروفنڭ قبولنى تام تاريخيله و طرزِ تطبيقنى ايكى كلمه ايله گوسترمسيدر.
اوچنجيسى: رسالۀِ نور شاكردلرينه و ناشرلرينه قارشى حضرتِ على رضى اﷲ عنهڭ إرشادكارانه و توجّهكارانه باقماسى و إشارت ايتمه سيدر.

اون سكزنجى لمعه

بِسْمِ اﷲِ الرَّحْمٰنِ الرَّحِيمِ

حضرتِ غوثِ أعظم شيخِ گيلانىنڭ (رض) صراحت درجه سنده كى كرامتِ غيبيه سنى تأييد و تقويه ايدن حضرتِ أسد اﷲ الغالب على ابن أبى طالب رضى اﷲ عنه و كرّم اﷲ وجهه، قصيدۀِ أرجوزۀِ مشهوره سنده عينًا إخباراتِ غوثيه يى تصديق ايدوب إشارت ايدييور.

مجموعة الأحزابڭ (٥٨٢) نجى صحيفه سندن (٥٩٧) نجى صحيفه سنه قدر او أرجوزه در. او أرجوزه نڭ موضوعى و ايچنده كى مقصدِ أصلى؛ إسمِ أعظمى تضمّن ايدن آلتى إسمڭ أهمّيتنى بيان ايتمك، هم او مناسبتله إستقبالده كى بر قسم امورِ غيبيه يه و تأسيسِ إسلاميتده بر قسم مجاهداتنه إشارت ايتمكدر.

أوت حضرتِ إمام (رض) استادى اولان حبيب اﷲ عليه الصلاة والسلامدن آلديغى درسڭ بر قسمنى إشارى بر صورتده ذكر ايدييور. فتحِ خيبرده كى هم معجزۀِ نبويه هم كرامتِ عَلويه اولان خارقه واقعه يى بحث ايتديگى گبى، تأسيسِ إسلاميته تماس ايدن مهمّ نقطه لرى ده بحث ايدييور. صوڭره إستقباله باقييور.

پيغمبرِ ذىشان عليه الصلاة والسلامدن آلديغى درسله، بر قسم أعرابڭ اوڭا قارشى عصيانلرندن حدّت ايده رك ديمش:

فِى عِلْمِ تِسْعِينَ حِسَابِ الْفَارِسِى ❊ مِن بَعْدِ قَرْنٍ تَاسِعِ الْمَعَاصِى
سَتَظْهُرُ الْفُرْسُ عَلَى اْلاَعْرَابِ ❊ تَقْتُلُهُمْ كَقَتْلَةِ الدَّوَابِ
تَكُونُ مَبْدَاُ فِتَنِ عَوَابِسِ ❊ مُظْلِمَةٌ كَظُلْمَةِ الْحَنَادِس

يعنى: طوقوز قرن صوڭره ”فرس“ يعنى، أقوامِ شرقيه أعراب اوزرينه هجوم ايده جك. غلبه ايدوب، حيوان گبى أعرابى كسه جك. اويله مدهش فتنه لر، قراڭلقلى مصيبتلر كه، أڭ قراڭلقلى گيجه لردن داها زياده قراڭلق اولاجق.

ايشته حضرتِ علىنڭ (رض) بر كرامتِ باهره سى كه؛ كندندن بش يوز سنه صوڭره گلن و عرب دولتِ عبّاسيه سنى محو ايدن و حدسز كتبِ إسلاميه يى نهرِ فراته دوكن و أعرابى غايت ظالمانه قتل ايدن هلاكو وقعۀِ مشهوره سنى خبر ويرييور. چونكه مشهور اولان قرن، قرق سنه دگل، او زمان إصطلاحنجه أغلبِ عمر اولان آلتمش سنه دن عبارتدر. چونكه بر دَور، آلتمش سنه ده دگيشير. بو صورتله إمامِ علىنڭ (رض) هجرتدن اوتوز سنه صوڭره كوفه ده يازديغى بو أرجوزه ده كى طوقوز دفعه آلتمش، اوتوزه علاوه ايديلسه بش يوز يتمش (٥٧٠) اولويور كه؛ جنگيزڭ و هلاكونڭ هجوم و تخريبات زمانيدر.

صوڭره حضرتِ جبرائيلڭ على نبيّنا و عليه الصلاة والسلام حضورِ نبويده گتيروب حضرتِ علىيه (رض) سكينه ناميله بر صحيفه ده يازيلى إسمِ أعظم، حضرتِ علىنڭ (رض) قوجاغنه دوشمش. حضرتِ على (رض) دييور: بن جبرائيلڭ شخصنى يالڭز علائم السماء صورتنده گوردم، سسنى ايشيتدم، صحيفه يى آلدم، بو إسملرى ايچنده بولدم؛ دييه رك بو إسمِ أعظمدن بحث ايله، بعض حادثاتى ذكردن صوڭره تحديثِ نعمت صورتنده دييور كه:

فَكُلُّ مَعْنًا مِنْ عُلُومٍ فَاخِرَةٍ ❊ مِنْ مَبْدَاِ الدُّنْيَا لِيَوْمِ اْلاٰخِرَةِ
قَدْ صَارَ كَشْفًا عِنْدَنَا عَيَانًا ❊ فَكُلُّ ذِى شَكٍّ غَدَا مُهَانًا

يعنى: أوّلِ دنيادن قيامته قدر علوم أسرارِ مهمّه بزه شهود درجه سنده إنكشاف ايتمش. كيم نه ايسترسه صورسون! سوزيمزه شبهه ايدنلر ذليل اولور.

صوڭره ينه إسمِ أعظم ايچنده بولونان او آلتى أسماءِ حسنىدن بحث ايدوب، بردن بره عينًا غوثِ گيلانىنڭ إخبارِ غيبيسى گبى، هلاكو عصرندن بو عصريمزه باقييور. ايكنجى بر كرامتِ غيبيه يى إظهار ايدييور و دييور كه:

اَحْرُفُ عُجْمٍ سُطِّرَتْ تَسْطِيرًا (حاشيه) ❊ بِتَّ بِهَا اْلاَمِيرُ وَ الْفَقِيرَا

يعنى: اون دردنجى عصرِ محمّديده (عصم) بيڭ اوچيوز قرق طوقوز (١٣٤٩) و روميجه بيڭ اوچيوز قرق يديده (١٣٤٧) عربى حروفنى ترك ايدوب، أجنبى و عجمى حروفنه إسلام ايچنده باشلانه جق. هم عموم، هم فقير و زنگين، أمير و ايشجى، چولوق و چوجق گيجه درسلريله او حروفى جبرًا اوگرنه جكلر. چونكه بر نسخه ده (بَاتَ) در. (بَاتَ) ايسه گيجه چاليشماسيدر. (بِتَّ) ايسه قطعى و جبرى إفاده ايدييور. {اَحْرُفُ عُجْمٍ} فقره سنده كى {عُجْمٍ} ايسه او زمانڭ إصطلاحنجه عربڭ غيرى لاتينجه و فرنگى حروف ديمكدر.

صوڭره دييور: {فَمَنْ اَرَادَ اﷲُ اَنْ يُعِينَهُ اَتْحَفَهُ بِهٰذِهِ السَّكِينَةِ} يعنى: كيم عنايتِ إلٰهيه يه مظهر ايسه، حضرتِ جبرائيلڭ تعبيريله بو سكينهِ قدسيه اولان إسمِ أعظمى جنابِ حق اوڭا هديه ايدر. اونڭله او زمانڭ شرّ و فتنه لرندن قورتارير.

بو سوزدن درت صحيفه أوّل ينه ديمش:

فَكُلُّ مَنْ لاَحَتْ لَهُ السَّعَادَةُ ❊ كَانَ لَهُ فِى الْجِيدِ كَالْقِلاَدَةِ

يعنى: كيم سعادته مظهر ايسه؛ سعيد ايسه شقى دگلسه، او إسمِ أعظم اونڭ بويننده مبارك بر گردانلق حكمنده بر نسخه اولور. صوڭره دييور:

ثُمَّ اعْلَمُوا مَعَاشِرَ اْلاِخْوَانِ ❊ اَنَّ غُوَاتَ اٰخِرِ الزَّمَانِ
هُمْ عُلَمَاءُ ذَوَّقُوا اَفْوَاهَهُمْ ❊ ثُمَّ انْثَنُوْا وَاتَّبَعُوا اَهْوَائَهُمْ

يعنى: او بدعه لر و عجمى و أجنبى حروفڭ إنتشارى زمانى اولان او آخر زمانڭ فنا آدملرى، بر قسم علماء السؤدر كه؛ حرص سببيله بطنلرينى حرامله طولديرمق ايچون، بدعه لره يارديم و فتوا ويرنلردر.

صوڭره بر قسم علماء السوئى طوقاتلامق ايچنده، بريسيله قونوشويور. دير:

فَاسْئَلْ لِمَوْلاَكَ الْعَظِيمِ الشَّانِ ❊ يَامُدْرِكًا لِذٰلِكَ الزَّمَانِ
بِاَنْ يَقِيكَ شَرَّ تِلْكَ الْفِتْنَةِ ❊ وَشَرَّ كُلِّ كُرْبَةٍ وَمِحْنَةٍ

يعنى: يا او زمانه يتيشن و عالملردن اولان إنسان! جنابِ حقدن او فتنه نڭ شرّندن محافظه ايچون سڭا درس ويرديگم إسمِ أعظم ايله دعا ايت!

فَاِنَّمَا نَحْنُ عَلَى التَّحْقِيقِ ❊ غَوْثٌ لِكُلِّ كُرْبَةٍ وَضِيقٍ

يعنى: بز آلِ بيتدن هر كربت و شدّت زماننده برر غوث چيقوب إمداد ايدييورز.

أسد اﷲ الغالب حضرتِ على ابن أبى طالب كرّم اﷲُ وجهه، إخباراتِ غيبيه يه عائد شو قصيده سنڭ بر قسمنده رسالۀِ نور شاكردلرينه، بِالخاصّه باقديغنه متعدّد أماره لر وار. او ده غوثِ گيلانى گبى رسالۀِ نورڭ مقبوليتنى إمضا ايدييور و آلقيشلايور.

برنجى أماره: لاتين حروفنڭ إسلاملر ايچنده جبرًا قبول ايتديرلديگنى تأسّفله بحث ايدوب و علماء السوئى طوقاتلاديغى يرده، بردن بره بريسيله إرشادكارانه قونوشويور. و دييور كه: {يَا مُدْرِكًا لِذٰلِكَ الزَّمَانِ} سڭا ويرديگم درس ايله حفظ دعاسنى ايت!

ايشته بو (مدرك) عينًا حضرتِ غوثڭ قصيدۀِ مشهوره سنده (مريدى) ديديگى آدمڭ عينيدر. چونكه ايكيسى ده عين فتنه دن بحث ايدوب، عموم ايچنده خصوصى بر آدمه إلتفات گوسترييورلر. قصيدۀِ غوثيه ده (مريدى) علمِ جفر و اون يدى أماره ايله ”ملا سعيد“ هم ”الْكُرْدى“ اولديغى تحقّق ايتمش.

رسالۀِ نورڭ بر واسطۀِ نشرى اولان استاديمزڭ هم إسمى، هم لقبى (مريدى) لفظنده اولديغى گبى، عينًا حضرتِ علىنڭ (رض) {يَامُدْرِكًا لِذٰلِكَ الزَّمَانِ} (حاشيه) علمِ جفرله و حسابِ أبجدله عينًا هم منلا سعيد، هم الْكُرْدى اولويور. هر بريسى ايكى يوز آلتمش بش ايدييور. (مدركًا) اوستنده كى تنوين وقفده ألفه إنقلاب ايتديگى ايچون (اَلْفٌ) اولويور. (مدركًا) لفظى ميمسز يوقاريدن اوقونماسيله (كرد) اولديغى گبى، (الزمان) لفظى ده بديع الزمانڭ بر پارچه سنى اوقومقله بو أماره يى لطافتلنديرييور. ديمك او زمانه يتيشنلرڭ آراسنده و حضرتِ علىنڭ (رض) خطابنه مظهر چوق أفراد ايچنده، رسالۀِ نور ناشرينه خصوصى بر إلتفاتى وار.

ايكنجى أماره: حضرتِ على (رض) حرص و طمع يولنده بدعه لره تابع اولان بر قسم علماء السوئى طوقاتلاديغى وقت، علما ايچنده بريسيله مرحمتكارانه قونوشمغه باشلادى. استاديمزى بيلنلره معلومدر كه: آنقره رؤساسى إستانبولده اونڭ إنگليزلره قارشى مجاهداتنى تقدير ايده رك اونى ايستديلر. آنقره يه گيتدى. وانده مدرسة الزهرا نامنده كندى دار الفنوننه يوز أللى بيڭ بانقنوط ايكى يوز مبعوثدن يوز آلتمش اوچنڭ إمضاسيله إعطاسى قرارلشديريلان لايحۀِ قانونيه قبول ايديلمكله برابر، شيخ سنوسى مقامنده ولاياتِ شرقيه واعظِ عموميلگى و هم دار الحكمتڭ أعضالرى اوراده ديانت رياستنڭ أعضالرى اولمقله، او ده ايچنده بولونمقله برابر مبعوث اولمق و داها نه ايسترسه ياپيلاجق دييه تكليف ايتدكلرى حالده، صِرف سنّتِ سنيه يه مخالف حركت ايتمه مك ايچون او تكليفلرى قبول ايتمه يوب، شيمدى يگرمى بش سنه إشكنجه لى بر أسارتى قبول ايدن استاديمزه ألبته حضرتِ علىنڭ (رض) علماء السوئه حدّت ايتديگى زمان اوڭا قارشى خصوصى إلتفاتى اولاجق و او معنوى مجلسده اونى اوقشايه جق. اونڭ ايچون بو حال بر أماره در كه؛ حضرتِ على (رض) حضرتِ غوثِ گيلانى (رض) گبى عموم مخاطبلرى ايچنده بو رسالۀِ نورڭ بر واسطه سى اولان خواجه مزه إشارةً إلتفات ايدييور. {نَحْنُ عَلَى التَّحْقِيقِ غَوْثٌ لِكُلِّ كُرْبَةٍ} فقره سنده ”غوث“ لفظيله غوثِ گيلانىنڭ (رض) مريدينه شفقتله باقماسنه حضرتِ علىنڭ (رض) باقديغنى ايما ايدييور.

اوچنجى أماره: علماء بحثنڭ أوّلكى سطرنده دييور: {فَمَنْ اَرَادَ اﷲُ اَنْ يُعِينَهُ (حاشيه ١) اَتْحَفَهُ بِهٰذِهِ السَّكِينَةِ} (حاشيه ٢) إسمِ أعظم بحثنده {فَكُلُّ مَنْ لاَحَتْ لَهُ السَّعَادَةُ ❊ كَانَ لَهُ فِى الْجِيدِ كَالْقِلاَدَةِ} يعنى: كيم عنايته و سعادته مظهر ايسه، او آخر زمان فتنهلرندن بو آلتى إسمى ويرديگم درس طرزنده ورد ايدنلر محفوظ قالير. حضرتِ على (رض) حروفِ أجنبيه يى إسلاملر ايچنده جبرًا قبول ايتديرمك حادثه سى ايله علماء السوئڭ بدعه لره يارديملرندن تأسّفله بحث ايدوب، او ايكى حادثه اورته سنده إرشادكارانه بعضلرندن بحث ايدييور كه؛ او سكينه اولان إسمِ أعظمله أجنبى حروفنه قارشى مقابله ايدييور و هم علماء السوئه مخالفت ايدييور.

ايشته بو زمانده او آدملر رسالۀِ نور شاكردلرى و ناشرلرى اولدقلرى شبهه سزدر. چونكه اونلردر كه؛ خطِّ قرآنى محافظه ايدييورلر و بدعه كار بر قسم علمالره قارشى ده مقاومت ايدييورلر.

أوت بز خواجه مزدن آڭلامشز كه: اون اوچ سنه أوّل حضرتِ علىنڭ (رض) بو قصيده سنڭ سرّينى بيلمه دن يدى سنه أوّل بو آلتى إسمى إمامِ غزالىدن درس آلارق و كندينه دائما ورد ايده رك، بتون أورادلرى تبدّل و تحوّل ايتديگى حالده، بو سكينه تعبير ايديلن آلتى إسمه حضرتِ علىنڭ (رض) ويرديگى درس طرزنده متماديًا ترك ايتمه دن دوام ايتمش. بو طرزده دوام ايدنلرى ايشيتمه مشز. هم خلافِ عادت بر طرزده يگرمى سنه ظرفنده يگرمى فتنۀِ عظيمه يه دوشديگى گبى و تأثيرلى بر صورتده حياتِ إجتماعيۀِ إسلاميه يه قاريشديغى حالده خارقه بر محفوظيت آلتنده اولديغنى گوزيمزله گورديگمزدن، حضرتِ علىنڭ (رض) آخر زمانده كى خطاب ايتديگى دوستلرى ايچنده بِالخاصّه اوڭا روىِ إلتفاتى اولديغنى حسّ ايدييورز. هم {لاَحَتْ لَهُ السَّعَادَةُ} لفظيله يعنى سعيد اولمق و علما بحثنه متّصل بريسنه عنايته مظهر اولديغنى و {يَا مُدْرِكًا لِذٰلِكَ الزَّمَانِ} فقره سى حسابِ أبجدله اون اوچنجى عصرى گوستروب، او عصرده دنيايه گلن علمادن سعيد (رض) إسمنده بريسنه لطيفانه بر ايما، بو أماره يى زينتلنديرييور. (حاشيه)

دردنجى أماره: حضرتِ غوثِ گيلانى فتنۀِ آخر زمانده سنّتِ سنيه يى و أسرارِ قرآنيه يى محافظه يه و نشره چاليشان بر مريدينه اون بش أماره ايله إلتفات ايدر و اونڭله قونوشورسه، ألبته إسلاميتڭ تأسيسنده ”أسد اﷲ“ عنواننى آلان و علومِ أسراريهده {اَنَا مَدِينَةُ الْعِلْمِ وَ عَلِىٌّ بَابُهَا} حديثنه مظهر بولونان و كراماتِ خارقه ايله إشتهار ايدن و وهّابيلرڭ أجدادى اولان خارجيلرى قلنجدن گچيرن و غوثِ أعظمڭ جدّى و استادى اولان حضرتِ على (رض) ألبته آلِ بيته بر جهتده دشمن اولان وهّابيلرڭ حرمينِ شريفَيْنى إستيلاسى هنگامنده و خارجيلردن داها برباد بر طرزده سنّتِ سنيه يه مخالفت ايدن بر قسم علماء السوء و ظلمه لرڭ إستيلاسى زماننده، رسالۀِ نور واسطه سيله رسالۀِ نور شاكردلرى بتون قوّتلريله سنّتِ سنيه نڭ محافظه سنه و آلِ بيتڭ حرمتنه و مودّتنه چاليشمالرى و او مدهش مهالكه قارشى صارصيلمدقلرى حالده، إمدادِ روحانىيه و قوّۀِ معنويه نڭ تقويه سنه پك چوق محتاج اولدقلرى بر زمانده، او علومِ أوّلين و آخرينى بيلديگنى مفتخرانه إدّعا ايدن حضرتِ على (رض) ممكن ميدر كه، أولادندن اولان غوثِ گيلانىدن (رض) گرى قالسين، شجاعتِ حيدرانه سيله رسالۀِ النور شاكردلرينڭ إمدادينه يتيشمه سين؟ ألبته بو صورتله يتيشير و يتيشدى.

”أى إنسان بڭا باق!“ او ”إنسان“ لفظِ عموميسنده قرينۀِ حال ايله، او معيّن آدمه خطابدر. مادام مقتضاىِ حال و قرينۀِ حال ايله حضرتِ علىنڭ (رض) عموم مخاطبلرى ايچنده أڭ زياده محتاج و أڭ زياده حضرتِ علىنڭ (رض) مقصدى لهنده حركت ايدن، رسالۀِ نور شاكردلريدر. ألبته او ذات إستقباله باقوب و {يَا اَيُّهَا اْلاِخْوَان} تعبيرى ايله قونوشديغى جماعت ايچنده أڭ زياده متحرّك و قوّۀِ معنويه نڭ تقويه سنه محتاج اولانلره خصوصيتله باقار.

بشنجى أماره: أجنبى حروفاتنى أهلِ إسلامڭ أڭ مهمّ حكومتى رسمى بر صورتده قبول و نشر و جبر ايتديگى حالده، رسالۀِ نور شاكردلرى بتون قوّتلريله خطِّ قرآنىيى خارقه بر صورتده نشر و تعميم ايله محافظه سنه چاليشدقلرى بر زمانده، حضرتِ على (رض) تاريخيله اوندن خبر ويرمكله غيبى كراماتى بيان ايتديگى يرده علماء ايچنده بريسنه إلتفات گوسترييور. ألبته بو إلتفاتڭ گرچه چوق أفرادى اولابيلير. فقط بو قرينۀِ حال گوسترييور كه؛ رسالۀِ نور شاكردلرى بر خصوصيت كسب ايتمش كه، حضرتِ على (رض) إلتفاتيله رسالۀِ نورى آلقيشلايور.

آلتنجى أماره: قوّتليدر فقط يازامايز.

يدنجى أماره: ظاهردر فقط گوستره مييورز.

الحاصل: حضرتِ على كرّم اﷲُ وَجْهَهُ أجنبى حروفنه قارشى شدّتلى تأسّف و حدّت ايتديگى و بدعه يه طرفدارلق ايدن بر قسم علماء السوئه قارشى شدّتلى نفرت و حدّت ايتديگى يرده، إرشادكارانه بعضلرله قونوشويور. و حضرتِ جبريلڭ تعبيريله سكينه إسمى ويريلن و إسمِ أعظم صندوقچه سى اولان أسماءِ ستّه يه دوام ايدنى إرشاد ايدييور، تلطيف ايدييور.

ايشته او أسماءِ ستّه نڭ دوامندن ترشّح ايدن و او أسمانڭ لمعاتى اولان رسالۀِ نور و او رسالۀِ نور كندى شاكردلريله لا أقل يوزر قلمله يوز پارچه رسالۀِ نورڭ أجزالريله و إنتشار ايدن يگرمى بيڭ نسخه سيله لا أقل يوز بيڭ آدمى حروفِ قرآنيه لهنه و سنّتِ سنيه يه إتّباعه و ايمانلرينڭ تقويه سنه و حضرتِ علىنڭ (رض) حدّت ايتديگى ايكى جريانه قارشى تماميله مقاومت ايتدكلرندن، ألبته حضرتِ علىنڭ (رض) {يَا ايُّهَا اْلاِخْوَانِ} تعبير ايتديگى إخوانلرى ايچنده خصوصى بر صورتده اونلره باقييور.

أوت حضرتِ علىنڭ (رض) بو ظاهر كراماتِ غيبيه سى حضرتِ پيغمبر عليه الصلاة والسلامڭ إرشاديله اولديغى ايچون، باشقه شكلده بر معجزۀِ پيغمبريه (عصم) اولديغى مناسبتيله، عين كرامتِ غوثيه و إشاراتِ خارقۀِ عَلويه گبى بشنجى عصرله، اون دردنجى عصرڭ فتنه لرينه إشارت ايدن و گيزلى قالوب معناسى آڭلاشيلميان بر معجزۀِ غيبيۀِ نبويه يى بيان ايتمگه مناسبت گلييور. شويله كه:

حديثِ صحيحده واردر كه، رسولِ أكرم (عصم) فرمان ايتمش: {اِنِ اسْتَقَامَتْ اُمَّتِى فَلَهُمْ يَوْمٌ وَ اِلاَّ فَنِصْفُ يَوْمٍ} (أو كما قال) شو حديثِ شريفه هر ناصلسه قيامته إشارت صورتنده معنا ويريلمش؛ معجزۀِ نبويه گيزلنمش، آڭلاشيلمامش. هم شيخِ گيلانى (رض)، هم حضرتِ علىنڭ (رض) إرشادِ نبوى ايله، بشنجى و آلتنجى و اون دردنجى عصرلرڭ فتنه لرندن كرامتكارانه بحثلرى گوسترييور كه؛ بو حديثِ شريف اونلرڭ بو زمانه باقمق ايچون بر تلسقوبلريدر كه، بو ايكى عصره باقييورلر. أوت حديثده ”يوم“ تعبيرى، {اِنَّ يَوْمًا عِنْدَ رَبِّكَ كَاَلْفِ سَنَةٍ ِممَّا تَعُدُّونَ} آيتنڭ دلالتيله بيڭ سنه دن عبارتدر. خلافتِ إسلاميه و حكومتِ عربيه، حديث موجبنجه تام إستقامتله گيتمديگى ايچون، تام نصفِ يوم اولان بش يوز كسور سنه ده (حاشيه) هلاكو هجوميله خاتمه ويريلدى. اوچ درت عصر زمانِ فترتدن صوڭره {يَاْتِى اﷲُ بِقَوْمٍ يُحِبُّهُمْ وَيُحِبُّونَهُ} آيتنڭ سرّينه مظهر اولان عثمانلى عادل پادشاهلرى، حديثِ شريفده كى إستقامتى يرينه گتيرمگه چاليشدقلرندن، حديثڭ حكميله اُمّت ايچون بيڭ سنه خلافتِ إسلاميه يى و شرعِ شريف اوزرنده گيدن حكومتڭ إدامه سنه واسطه اولديلر. حديثڭ ايكنجى جهتى كه، {فَلَهُمْ يَوْمٌ} ده تحقّق ايدييور.

و إستانبولڭ فتحندن تقريبًا يگرمى سنه أوّل ينه خلافتِ إسلاميه يه زمين إحضار و تام عموم عالمِ إسلامڭ مركزِ حكومتى اولاجق بر وضعيت آلمغه و مژده و ثناءِ نبوىيه مظهر اولان سلطان فاتحڭ واسطه سيله إستانبولڭ فتحى تاريخندن فترت زماننى طىّ ايدوب عبّاسيلر نره دن بيراقمشلرسه اورادن باشلايه رق عالمِ إسلامڭ بِالإستحقاق باشنه گچديلر. ينه حديثِ شريفڭ حكميله أگر إستقامتله گيتسه بيڭ سنه دن عبارت اولان بر گون، يوقسه ياريم گون دوام ايده جك. ايشته عينًا عبّاسيلر گبى تام ياريم گون يعنى بش يوز سنه دوام ايتدى.

بو معجزۀِ نبويه پك پارلاق بر صورتده تظاهر ايدييور. ايشته خلافتِ عربيه تام إستقامته مظهر اولماديغندن يالڭز ياريم گونى آلدى. عثمانلى دولتى دخى تك باشيله آخرلرنده أجنبيلرڭ و منافقلرڭ مداخله لرى يوزندن تام إستقامتى محافظه ايده مديگى ايچون او ده ياريم گون اولان بش يوز سنه يى آلدى. بو ايكى قارداش اولان ايكى عنصرڭ إتّحادلرندن تام إستقامته مظهريت سرّى واردر كه، بيڭ سنه اولان بر گونى تمام آلديلر.

سؤال: رؤياىِ صادقه واسطه سيله ويا حقيقى كشف جهتيله حضرتِ على (رض) و غوثِ أعظم (رض) گبى ذواتِ قدسيه جزئى ايشلره دائر عامى آدملرله ده تماس ايده بيليرلر و بعض شيلرى خبر ويرييورلر. نه دندر كه؛ بونلرڭ بر إشارتِ غيبيه لرينى غايت أهمّيتله بيڭ كشف و بيڭلر رؤياىِ صادقه قدر طوتويورسڭز، أهمّيت ويرييورسڭز؟

الجواب: سكز يوز و بيڭ اوچيوز سنه مسافه ده، وراثتِ نبوّت مقامنده عالمِ إسلامڭ إستقبالى نقطۀِ نظرنده كلّى بر نظره او اوزون مسافه ده گورونن حادثاتڭ ألبته چوق أهمّيتى اولاجق، طاغ گبى بر بيوكلگى اولاجق كه؛ او اوزون مسافه ده و او كلّى نظرده عالمِ إسلامڭ منفعتى نقطۀِ نظرنده اوزاقدن گورونسون و اوڭا دقّت ايديلسين و وجوده گلمه دن أوّل اوندن خبر ويريلسين. رؤياىِ صادقه و كشف ايسه جزئى و خصوصيدر و وجوده گلدكدن صوڭره ياقيندن باقمقدر. ألبته بويله كشف جهتنده روحانى تمثّل إعتباريله ياقيندن باقيلديغى وقت ذرّه لر دخى گورونه بيلير. عادى آدملر ده اونلرڭ روحانى مثاللريله گوروشه بيليرلر و غايت أهمّيتسز شيلر ده مدارِ نظر اولابيلير. أوت بر آيينه ده مثالى گونشله مناسبتدار اولمق و صحبت ايتمك نره ده؟ حقيقى سماده كى گونشله مناسبتدار اولمق نره ده؟ آيينه ده كى گونشى هركس ألنه آلابيلير، إلتفاتنه مظهر اولابيلير. قونوشه بيلسه بلكه قونوشديره بيلير. فقط سماده كى گونشڭ إلتفاتنى جلب ايدن و كنديسيله قونوشديران كيمسه، قمره چيقمالى، مقامى قمرده اولمالى ويا قمر گبى بر وظيفه گورملى؛ يوقسه او سلطانِ سماوينڭ حشمتلى نظرى آلتنده هيچ گورونميه جك درجه ده گيزلنه جكدر.

رسالۀِ نور شاكردلرى نامنه

بكر بك، عاصم، كچه جى مصطفى، مصطفى، مصطفى، على، سليمان رشدى،
عبدا ﷲ، خسرو، رأفت، سليمان، صبرى، خلوصى، باباجان محمد على،
مسعود، حسين، غالب، حافظ على، كوچك لطفى، ذكائى،
عبد الباقى، شاملى حافظ توفيق، يعقوب جمال وسائره

Bir Cevap Yazın

Aşağıya bilgilerinizi girin veya oturum açmak için bir simgeye tıklayın:

WordPress.com Logosu

WordPress.com hesabınızı kullanarak yorum yapıyorsunuz. Log Out / Değiştir )

Twitter resmi

Twitter hesabınızı kullanarak yorum yapıyorsunuz. Log Out / Değiştir )

Facebook fotoğrafı

Facebook hesabınızı kullanarak yorum yapıyorsunuz. Log Out / Değiştir )

Google+ fotoğrafı

Google+ hesabınızı kullanarak yorum yapıyorsunuz. Log Out / Değiştir )

Connecting to %s

%d blogcu bunu beğendi: